Joekskepèl Schots en Scheif is opgerich in april 1975, toen eine gas voetballers van Venlosche Boys met de vastelaovend kinnis hadde gemak met ’t fenomeen joekskepèl. Zeej dóchte det aste kins voetballe ut meziek make ouk gen probleem kós zien (veel det fiès taege!). D’r woorte twieë minse gevraog um eur muzikale kinnis in te bringe en toen kóste de repetisies van start gaon in de kas van Lei. Naodet nao ein paar waeke aan d’n dirigent woort gevraog waat hae d’r van vónd, kwaam hae met d’n oetspraok det ut allemaol waal “schots en scheif” waas. Daomei waas ózze naam ein feit. Det scheif waas waal duùdelik, maar d’r meus ouk nog iets met “schots” gedaon waere, en dus loog ut veur de hand det weej as tenue eine schotse kilt kaoze. Veural de vruikes bliéke altièd zièr geïnteresseerd te zien in waat weej waal of neet ónder dae rok aan hebbe, maar det is ós geheim!

Umdet de groep erg óngedöldig waas en weinig interesse toeënde in de muzikale theorie, waorte d’r cieferkes baove de noeëte gezatte, Met dees erfenis zitte inkele leeje nog steeds opgescheep. Ut iérste optraeje vónd plaats ter gelaegenheid van de verjeurdaag van ein van de leeje. Of de toehuurders vasgesteld hebbe det d’r “ lang zal hae laeve” woort gespeuld, is de vraog.

In 1978 dörfde weej ut aan um same met 13 andere joekskepèlle oet Venlo, wao-ónder name as Kappes Kook, de Schraevelaers, de Knungelaers, “t Hetje, Gaer Gedaon en Boete de Päört, ós muzikale kunste vas te ligge op ein elpee, geneump “Alle 14 d’r naeve”. Waorum zal det zien gewaes? Aste det noow truuk huùrs, heste in idder geval kans det dich de schoonreme oet de schoon springe.

Nao verloup van tiëd kwame d’r steeds mier leeje van boéte de vereniging beej, en woort, nao inkele umzwervinge, de kas van Lei ingeruild veur ut huidige repetisielokaal beej de Maagdenberg.

In 2002 vónde weej ós muzikale niveau inmiddels zoeëdanig det de muzikale oétspattinge op ut bekinde schiefke woorte vasgelag  met de vuuëlzeggende naam Jónges, Jónges. In detzellufde jaor woorte weej gevraog as boerebroelofskepèl beej ut boerebroelofsgezelschap van Venlosche Boys. Dit alles beej mekaar makde 2002 veur ós ein gedinkwaerdig jaor.

Jaorliks truukkiérende evenemente zien netuurlik de Venlose Vastelaovend en alles dao umhaer en ut bezeuk aan de wienfeeste in Duitsland.  Veur de res speule weej op evenemente (groeët of klein) wao de gezelligheid veurop steit.

In 2007 brachte weej tiédes de wienfeeste ein bezeuk aan Linz. Vanaaf ein terrasje woorte de luusteraers getrakteerd op ós klanke. Bliekbaar ware ós instrumente zoeë good gestump, det emus van ’t organisatiekomitée van de Kölsche Rosenmontagszug ós ter plekke woel kontraktère. Weej hebbe um toen ós adreskaertje gegaeve. Waat schets ós verbazing toen d’r ein paar waeke later ein offisjele oétnuuëdiging in de bus veel! Det waas bliekbaar zoeë biezónder det die oétnuuediging zelfs Tante Bet haolde.

Ondertösse hadde weej waal gelaeze waat die Pruuse allemaol van ós woele: Weej meuste ós vruikes en kinder en ózze waage thoès laote, ’n eurke of veer “marschieren”, speule waat zeej gaer woele, niks drinke en idderein dae gen instrument beej zich zoel hebbe, zoel naor hoes gesteurd waere. Ouk meus ózze outfit gekeurd waere. Det ging ós allemaol ein biétje te vaer. Wao hebbe weej ’t euver? Euver vastelaovend toch. Dao kinse toch neet de spontaniteit op die meneer oethaole! Det alles haet ós doon besloete det weej de vastelaovend lekker in’t Stedje van Lol en Plezeer bliève vière, zoeëas weej det zelf gaer wille.

Op 7 april 2008 bestónd de kepèl 33 jaor. Det waas veur ós aanleiding om ós in ’t niej te staeke en det haet d’r toe geleid det weej ós vanaaf daen tièd in ózze nieje outfit kinne presentère. Det haet aevel waal nogal wat veut in aerd gehad. Os Pakistaanse vrinde die ózze outfit meuste levere waare neet zoeë snel of waare meschiens ein bietje gepikeerd door oetlaotinge van eine bekinde politicus, want ’t deurde nogal ein tièdje veurdet weej de kleiage in hoes hadde. Oetintelik is toch alles good gekómme zoeèdet weej aan ’t ind van ós jubeljaor toch veurzeen zien van niej kleiage.

De kepèl telt in totaal 19 leeje. D’r is weinig verloup en de opkóms beej optraejes en repetisies is altièd hoeëg.

Leon Versteilen ièrelid Schots en Scheif

Tiédes ’t 4 kier 11 jäörig jubileumfees is Leon beneump tot ièrelid van Schots en Scheif. Hae is al jaorelang veurzitter/penningmeister van de kepèl. Daonaeve is hae de muzikaal leider en verzörg hae de partieje. Al dees verdeenste zien de raeje det hae tiedes ’t jubileumfees door Aloys woort toegespraoke en de golde speld van ’t ièrelidmaatschap kreeg opgestaoke.

Heejmei is ’t aantal ièreleje op 3 gekómme. Naeve Leon zien det Aloys en Sef.

In memoriam Jan Hovens

Weej zien zièr óntdaon door ’t berich det ózze mezièkvrind Jan is euverleeje. Met vastelaovend haet hae ós nog letterlik door de straote van Venlo en Bliërick getrókke. Op det moment wiste we al det hae eine zwaore tièd taegemoot zoel gaon, maar weej ware, zoeëas haezelf ouk, d’r van euvertuùg det alles good zoel kómme. Helaas haet det neet zoeë meuge zien. Jan waas ózze vaste en betrouwbare chauffeur in de vastelaovesoptochte. Hae vónd de vastelaovend zoeë leuk det hae besloot zien muzikaal talent oèt te bouwe op de tamboerijn. Aafgeloupe jaor waas hae de veurtrekker beej ’t umbouwe van de vastelaoveswage, wao hae in zien eige vertrouwde umgaeving hièl vuuël tièd in haet gestaoke en wao hae ós ein werm en hertelik ónderdaak booj.

Jan bedank veur alles was-se ós hebs gegaeve. Rös zaach.

Weej winse Gerry, de kinder en vaerdere femilie hièl vuuël sterkte beej ’t verwerke van dit groeëte verlees.

Wiel haet ós verlaote. 

óndanks det zien gezóndheid um in de steek leet, kwaam ’t berich det ózze koempel Wiel is euverleeje, as eine mokerslaag. Op de letste rippetisie aafschièd genóme met “wies nao de vekansie”, mótte weej noow veurgood aafschièd neme.

Wiel, weej weite det ’t dich vuuël pien deej des dich neet mier mei kós doon beej optraejes, maar weej zooge ouk des dich met volle teuge genoots op de rippetisies.  Meschiens hebbe weej ’t neet met zoeëvuuël wäört gezag, maar weej vónde dich eine kanjer! Dich bliefs beej ós in herinnering as eine gooje mins met ’t hert op de juuste plaats. Wiel, bedank veur wae-se waas!

Weej winse Paula, de kinder en  vaerdere femilie hièl vuuël sterkte beej ’t verwerke van dit groeëte verlees!

Wiel, rös zaach!

De maedjes en jónges van joekskepèl Schots en Scheif

Jubilarisse 2024

In ’t 49ste laevesjaor van Schots en Scheif zien d’r twieë leje die ein jubileum viere. Marc en Ron zien allebei 25 jaor lid. Op de jaorvergadering wuurt tradisiegetrouw ein jublileumspeldje veur 25 jaor trouw lidmaatschap oétgereik. Marc en Ron van herte perfitsia met dit schoeëne jubileum names alle jónges van Schots en Scheif! Det geej d’r nog 25 jaor aan vas meug knuipe!

Jubilarisse 2022

Op de jaorvergadering van 2022 zien d’r weer inkele jubilarisse gehöldig. Arno en Paul zien 25 jaor lid en Wiek maar leefs 40 jaor. Aan ierelid Sef de iér um de beejbehuurende jubileumspeldjes op te spelde beej Wiek en Arno. Arno móg det op zien beurt doon beej Paul.

Jubilarisse 2018

Op de jaorvergadering van 2018 woort Ben verras. Hae woort in ’t zunke gezatte umdet hae vanaaf september 1992 lid is van Schots en Scheif. Ben vierde tot zien eige verbazing zien 25-jäörig jubileum. Van ierelid Sef kreeg hae ’t beejbehuurende 25-jäörig jubileumspeldje opgespeld.

Jubilarisse 2015

Op de jaorvergadering van 2015 woorte dreej leeje in ’t zunke gezatte. Leon, Aloys en Sef zien vanaaf de oprichting in april 1975 lid van Schots en Scheif. Arno deej ein wäördje en de dreej krege ’t beejbehuurende 40-jäörig jubileumspeldje opgespeld.

Jubilaris 2014

Op de jaorvergadering 2014 woort Jean-Pierre gehöldig. Jean-Pierre is 25 jaor (plus ein biètje) lid van de joekskepèl. Leon sprook ein woord van dank veur JP zienen inzet in de aafgeloupe 25 jaor en hae kreeg ’t beejbehuurende 25-jäörig jubileumspeldje opgespeld door Ièrelid Aloys.

Jubilarisse 2012

2012 waas ’t jaor det Jos en Pierre op de jaorvergadering gehöldigd woorte veur eur 25-jäörig lidmaatschap. Zeej woorte door Aloys in ’t zunke gezatte en ontvinge de beejbehurende versiersele.

Jubilarisse 2009

Op de jaorvergadering 2009 woorte twieë jubilarisse gehöldig. Wiel en Bob zien in 2009 allebei 25 jaor lid van de joekskepèl. Zeej woorte door ièrelid Aloys toegespraoke. Hae bedankde eur veur euren inzet en inbring in de afgeloupe 25 jaor. Wiel en Bob krege ’t 25-jäörig jubileumspeldje door Aloys opgespeld. Heejmei kump ’t aantal leeje det 25 jaor of langer lid is van de kepèl op 6.

Sef Nefkens ièrelid Schots en Scheif

Op de jaorvergadering van 8 april 2003 is Sef Nefkens beneump tot ièrelid van Schots en Scheif. Sef is vanaaf de oprichting in april 1975 lid van Schots en Scheif en haet vanaaf ’t ièrste aor vuuël werk verzatte veur de joekskepèl. Hae waas degene dae muziekpartieje verzörgde en hièl vuuël organisatorische zake veur zien raekening noom. In latere jaore vervölde hae ouk de rol van veurzitter/penningmeester. Vanwaege drökke werkzaamheden haet Sef nao 27 jaor beslaote om zien actieve loupbaan as trompettis te beëindigen.

Tièdes de jaorvergadering woort Sef toegespraoke door ’t tot op det moment insigste ièrelid Aloys Peeters. Aloys leet in ziene toespraok op humoristische wiès ein aantal gebeurtenisse oet ’t 27-jeurig lidmaatschap van Sef de revue passere. Ook wees Aloys um op de “verplichtinge” die röste op de functie van ièrelid zoeas ’t deilneme aan activiteite die ’t ièrelid zelf leuk vindt, de zwaore opdrach um de joekskepèl te vergezelle naor de wienfièste en de jaorlijkse dineetjes veur ièreleeje van Schots en Scheif.

Sef, de “jónges” van Schots en Scheif bedanke dich van herte voor al ‘t werk des dich hebs verzatte. We haope des dich vuuël plezeer meugs belaeve aan ’t ièrelidmaatschap en det weej dich regelmaotig meuge verwelkóme beej de verschillende activiteite van Schots en Scheif!