Jubilarisse

Op de jaorvergadering van 2015 woorte dreej leeje in ’t zunke gezatte. Leon, Aloys en Sef zien vanaaf de oprichting in april 1975 lid van Schots en Scheif. Arno deej ein wäördje en de dreej krege ’t beejbehuurende 40-jäörig jubileumspeldje opgespeld.

Schots en Scheif 40 jaor jónk!

7 april 1975 waas d’n daag det joekskepèl Schots en Scheif woort opgerich. Dit jaor viere we dus ós 40-jäörig bestaonsfees. Umdet 40 jaor veur ein joekskepèl gen joeksig getal is, halde we ’t bescheide wies det we 44 jaor bestaon. Dinsdaag 7 april ós jaorvergadering met aandach veur de viertig jäörige jubilarisse en zaoterdaag 2 mei ein jubileumoètstepke met ós partners.

In tante Bet

Vlak veur de vastelaovend zoot d’r beej tante Bet (de Limburger) ein spésjale oètgave die ging euver ’t fenomeen joekskepèl/joekskapel. De krant vónd ’t de meujte waerd um ouk ein stök euver de historie van Schots en Scheif te schriève. Veur degene die ’t neet gelaeze hebbe, klik heej.

Vastelaovend 2015

Aan alles kump ein ind

Det waas ’t dan, Vastelaovend 2015 is weer verleje tièd. Ut waas eine Vastelaovend met lekker zunke, lekker windje, lekker waerke, met daobeej netuurlik alle ingrediënte die de Vastelaovend zoeë uniek make. Wat blief zien de herinneringe die we truuk kinne haole van de foto’s en de filmkes. Klik heej veur ’t filmke van d’n optoch in Bliërick en heej veur ’t filmke van d’n optoch van Venlo. Ouk zien d’r nog filmkes gemak van de JoekskepèlleParade. Klik daoveur heej of heej, Alle filmkes staon ouk op ós multimediapagina. Heej kinne de vastelaovesfoto’s bekeke waere.

Altweiber in Kölle

Ouk dit jaor zien we weer naor Kölle aafgereis um dao, geneetend van ein schitterend zunke, met de Altweiber fees te viere. Efkes zoog ’t d’r nao oèt det ze ós dao woele halde, want de ganse Bannhof woort aafgeslaote umdet emus zien kufferke had achtergelaote, maar det kwaam allemaol weer good. Klik heej veur de foto’s

De waeke veur Vastelaovend

De Vastelaovend kump d’r weer aan. De ièrste optraejes en oètstepkes ligge weer achter ós. Via de kiekjes heejónder kin d’r nog truuk gekéke waere op detgene wat alweer verleeje tièd is. Klik daoveur heej

JoekskepèlleParade

Ein tradisie die neet mièr is weg te dinke in de Venlose vastelaovend: de JoekskepèlleParade op vastelaoveszóndaag op de Parade in Venlo. Elk jaor opnièj struie de kepèlle vanaaf ein podium eur toeëne oèt euver de vastelaovesvierders. Dit jaor geit det ein biètje anders. Ut podium is ingeruild veur 2 joeksmobiele die midde op de Parade staon, wao vanaaf iddere kepèl ein half oor ein optraeje verzörg.

 

Vacature

In verband met neteurlik verloup hebbe weej ein vacature veur eine bariton- of tubaspeuler. Kinse bariton of tuba speule of wilse ’t gaer lière en vinse ’t leuk um beej ós te kómme speule, meld dich dan via ’t mailadres op de aanvraoge/kóntakpagina of loup ens binne beej de rippetisie (20.30 oor wies 22.30 oor) op dinsdaagaovend beej Grand Café De Maagdenberg. Kontak opneme met ein van de leeje kin neteurlik ouk.

Incognito

Aaf en toe zien d’r van die daag desse d’r incognito op oèt treks. Zónnen daag waas koupzóndaag op de shoppingzone Maasboulevard. Sinterklaos waas d’r, de Pietekepèl waas d’r, ’t waer zoot mei en d’r waas vuuël winkelend publiek. Klik heej veur ein filmke

Fees op de Römerplatz

 

Ein van de sjiekste jaore op de Wienfeeste van de Heimat- und Verschönerungsverein Rheinbrohl e.V. Zoeë kinne we dit jaor waal tiepère. Carla, Franz Josef en neet te vergaete ózze Betreuer Jürgen, hebbe d’r alles aan gedaon um ós te verwinne. En det is eur gelök. Zelfs de kalden doesch dae sómmige langslaopers hadde gevraog, woort geregeld. Vaerder zörgde ’t weer d’r veur det de Römerplatz vrièdag en zaoterdaag good vol waas, zoeëdet ouk de muzikale oètdaging veur ós geregeld waas. En ouk det mót gezag, oèt de reaksies bleek det we die opgepak hebbe. Smeis “Atemlos” woorte de noeëte euver ’t publiek oètgestruid en dao gölzig opgepak. Ein jaor um neet te vergaete! Klik heej veur de foto’s.

Jubilaris

Op de jaorvergadering 2014 woort Jean-Pierre gehöldig. Jean-Pierre is 25 jaor (plus ein biètje) lid van de joekskepèl. Leon sprook ein woord van dank veur JP zienen inzet in de aafgeloupe 25 jaor en hae kreeg ’t beejbehuurende 25-jäörig jubileumspeldje opgespeld door Ièrelid Aloys. Heejmei steit d’n teller van ’t aantal leeje det 25 jaor of langer lid is van Schots en Scheif op 7.

Det waas vastelaovend 2014

Vastelaovend 2014 is weer verleeje tièd. Ein aantal waeke van optraejes leet achter ós. Weej wille gaer idderein bedanke dae d’r aan haet beejgedrage det weej met vuuël plezeer kinne truuk kièke op dit waan vastelaovesseizoen! Um aaf en toe nog effe truuk te kinne kièke en herinneringe op te haole zien d’r foto’s gemak. Klik daoveur heej. Veur ’t filmke van d’n optoch in Bliërick, klik heej en dae van Venlo klik heej.

Vastelaovestrein kump op stoum

We zien d’r klaor veur. Ós vastelaovesprogramma is óngevièr bekind, de vastelaovestrein kin dus vertrekke. We starte beej ’t jubilerende gezelschap van VG de Vogelhut. Daonao wuurt ’t vastelaovesbal van de G-voetballers van Venlosche Boys opgeluusterd. As det is gewaes, is ’t tièd veur ’t Boeremoosbal. Dan kière we truuk beej de Vogelhut, wao ’t Prinsebal op ’t programma steit, gevolg door ’t Prinsematinee beej de Beerpiëp. Daonao geit d’n trein twieë kièr naor Pruusses, eine kièr zien we in Straole en eine kièr in Kölle. As we det alles achter de rök hebbe is ’t al vriédaag veur vastelaovend. Op deezen daag speule we traditioneel op ’t amtenaerebal van de gemeinte Venlo, waonao we klaor zien veur de Dreej Dolle Daag.