Joekszitting VG de Vogelhut

Net veurdet de december feesdaag veur de deur staon hebbe we al efkes aan de Vastelaovend kinne ruke beej de joekszitting van VG de Vogelhut. Het waas eine kwante aovend veur eine volle zaal met ein keur van artieste die de minse in de juuste stumming wiste te bringe. Ein zitting waobeej vuuël woort gelache maar ouk inkele traone vloejde tiedes ’t aafschied (Facebook filmke) van ’t dreejspan Prins Michel I en zien adjudante Roy en Rob. Met dank aan VG de Vogelhut veur de gooje verzörging!

Wien- of beerfees: Rheinbrohl wir sind dabei!

Ozze spesjale verslaaggaever haet ein stökske geschréve euver ’t Wienfees in Rheinbrohl. Laes ’t heejónder. De foto’s kinne heej bekéke waere.

Vriedaag 4 oktober waas ut weer zoeëvaer: ut culturele hoeëgtepunt van ut jaor stónd veur de deur, ‘t Wienfees in Rheinbrohl, al vanaaf 2003 ut vaste treffe met alde en nieje bekinde.
Vanaaf un oor of 4 op vriedaagmiddaag dröppelde idderein binne beej ut kefeeke van Dietmar dae un lekkere stange Bitburger oét ut vaat serveerde. D’r woort heerlik gealdehoord en ut waas flot un vetrouwd gehiél zoeë met de plaatselikke hangjeug. Ut tempo waas strak te neume en naodet we tössedoor de bedjes hadde opgemak in de Turnhalle beej de plaatselikke Turnverein 1882 e.V. in de Maria-hilf-mir-doch-Strasse, bleef det tempo hoeëg. Dan maar rap unnen telder Duits bikke besteld: unnen bak slaaij, Pommes en Schnitzels in alle soorte met ein gemeinschappelik kinmerk: zoeë groeët wie un deurmat. Oh jao, d’r meus ouk nog efkes getraöt waere op de Römerplatz. Naodet we ut podium voldoende oranje hadde gemak, woorte d’r unne gas nummers gespeuld die d’r in ginge wie kook. Willy’s kleplokaal woort ouk nog met un bezeuk veriert en ouk heej waas ut opvallend det vueël kleppe gaar neet deur hoof te zien. Met regelmaot woort d’r eine gesponsord. De plekband dae achter de bar loog um ós daor te halde, waas gaar neet nuuëdig gewaes.

Ja, en dan geit d’n daag op ut ind en kump die Turnhalle toch waal good van pas. Op dieke matte, kleine matte, lange matte, veldbedjes, lóchbedjes, zeg maar alles wao desse op kins ligge, woort de nachrös aanvaart. Tenminste veur degene die de melis vol hadde. Inkele hangjongere kwame netuurlik waat later.

Zaoterdaagmorrege krege we van ozze persuuënlikke betreuer Jürgen en zién rechterhand Klaus un heerlik óntbijt geserveerd. Alles woort resloos opgemiecheld en toen woort ut tied um ut plaatselikke Schützengilde Rheinbrohl 1927 met un bezeuk te veriére. Idder moch 5 kier met scherp paave. We zoele ut opneme taege de Franse partnerstad van Rheinbrohl maar die Franse dörfde neet. Begriepelik want d’r woort “met sjerp gesjaote.” De ierste klepkes woorte alweer genuttig maar ut waas dan ouk al haos twellef oor. Wien, baer en unnen inkeling dae neet dórfde un colaatje. Good, nao ald Duits gebroek stónd d’r um tien euver twellef un gans peloton BBQ-ers klaor die wörskes en karbenaadjes veur de ganse meute braojde en nao binne brachte. Dao woorte die met slaaij, stekkemik, en wat neet miér, nao binne gehouwd.

Toen waas d’r tied um d’n binnekant van de ougleeje te gaon bekiéke in os hotel aan de Maria-hilf-mir-doch-Strasse. De meiste verstendige minse makde dao gebroek van. De minder verstendige meuste waal! Toen woort ut tiéd um zónder raegen, in schots kostuum mét ónderfleur nao de Römerplatz te gaon wao de Wienkeuninginne, Prinsesse en al eur helpers zich presenteerden aan ut volk. Ierlik is ierlik: die van ós, Königin Eva en Prinzessinen Andrea en Luisa ware met aafstand ut moeëjste iets wat de meiste kepelleje ouk vónde. Dao zoelse waal un glaeske wien mei wille drinke… en…

Det gebeurde dan ouk. Ut is wörkelik ónveurstelbaar det d’r tósse ut nuttige van pak um beet 30 liter wién nog tied waas um 4 setjes muziek te make hoewaal de letste nummers veural enthousias ware… Gelökkig waas d’r genóg geklep zoeëdet de meiste ut neet kalt krege. Die det waal krege, of die anderszins un bietje óngesteld ware, ginge nao de Maria-hilf-mir-doch-Strasse um te gaon knippe.

Zóndaag waas haos utzelfde as zaoterdaag: we ginge in de stroumende raegen nao ut Erntedankfest in St. Hubertus, ut Altersheim. Dao woorte geschenke getausch, limenaad gedrónke, unne inkeling toch beer, Bürger Oliver stook de kepèl nog unne gas vere in de kónt en Arno belaofde det we meschiens waal truuk kómme.

Good, samegevat: de Schützenkeuning van de kepel is Wiek, Duitse biefstök haet vueël bot, Rheinbrohl haet de lekkerste wien, kiëk maar nao de vrouwluuj, 30 liter wien is un eitje, de zwaortekrach nao twellef oor is groeëter as d’r veur, de plaatselikke kebabtent haet mier as vleis, de HVV besteit, inkele Bitburger kleppe is neet erg…, de hellinge zién stiel, GUTENMORGEN is neet altied unne gooje morrege, snörke wuurt neet veroorzaak door tevuuël kleppe, met 19 man in un Turnhalle slaope is superaffentietengeil.

Ut zoel zoeëmaar kinne det de Jahresversammlung zaet: bis nächstes Jahr Reinbrohl!!!!

Wienfeeste Rheinbrohl

Weej hebbe zin drin …, ouk dit jaor weer naor Rheinbrohl! Laes heejónder wat de Wienkönigin schreef:
 
Liebe Rheinbrohler, liebe Besucher aus Nah und Fern,
herzliche Einladung meine Gäste beim Weinfest am caput limitis, am ersten Wochenende im Oktober, in Rheinbrohl zu sein.
Mit meinen Weinprinzessinnen Andrea und Luisa feiern wir mit Live-Musik, kleinen Köstlichkeiten und leckerem Mittelrheinwein.
Natürlich werden auch unsere Niederländischen Freunde “SCHOTS EN SCHEIF” dabei sein, auf die wir uns ganz besonders freuen.
Aus unserer Partnerstadt Bourcefranc le Chapus/Frankreich kommen die frischen Austern, ein highlight an unserem Weinfest!
Die Weinstandbetreiber erwarten Sie und bedienen Sie gerne.
 
Wir freuen uns auf ein tolles Wochenende
Ihre Weinkönigin Eva
von Rheinbrohl & Hammerstein
 

Schots en Scheif koedeljach oétgebreid

Ózze koedeljach is weer oétgebreid. Fréderique en Luc zien de trotse elders gewaore van dochter Romée. De Schots en Scheif femilie wins eur van herte perficiat met dit kleine wereldwonder en hiél vuuël laevesgelök met z’n dreeje!

 

Jubeloétstepke 2019

Met dank aan de feescommissie hebbe weej ein fantastisch jubeloétstepke meuge belaeve!
In vogelvluch: zaoterdaagmorge met Arriva, Arriva naor Remund en van dao oét weer met Arriva, Arriva maar dan euver de waeg naor Adams wao weej te zeen krege wie ’t iezer gemak wuurt wao weej zuuvere noeëte oét probere te kriege. Dan naor ’t witte dörpke Thorn um ós te laote inwieje in de historie van ’t dörpke. Toen met d’n boeët euver ’t water um daonao lekker te gaon aete beej ’t Oolderhuuske. Vervolges meus d’n dors geles gaon waere beej Resistent in Remund. Nao in de Oranjerie te hebbe genaote van de nachrös en ein lekker ontbijt haet Arriva, Arriva ós weer truuk gebrach naor Venlo wao we via eine pitstop beej de Klep beej ’t Jocus Museum oétkwame. Dao krege we ein interessante róndleiding en kóste we ein stökske echte vastelaovesgeschiedenis opsnoeve. Daonao nog effe d’n dors lesse beej de Witte um met ein diner aaf te sloete beej ós rippetisieresedensie de Maagdenberg wao ós zengers spesiaal veur ós nog ein minikonzert verzörgde. Ouk Arno meus op verzeuk nog effe zien kunste op de piano laote huure veurdet idderein met ein good geveul nao hoes kós gaon.
Klik heej veur de foto’s en heej veur ’t minikonzert.

Zomerstop veurbeej, niej seizoen steit veur de deur

Zoeë, de zomerstop zit d’r op dus we pakke d’n draod weer op. Op nao ein niej seizoen vol joeks, jen en meziék. En netuurlik neet te vergaete ós jubileumoétstepke. Wao nao toe? Det is veur de meiste van ós nog ein verrassing. Maar iérs de iérste rippetisie en daonao, op zóndaag 25 augustus, ós iérste optraeje beej de Zeskamp van ’t G-voetbal van Venlosche Boys.

Boerebroélof 2020

In ós zomerreces toch nog efkes aan de vastelaovend meuge ruuke. Boerebroélof Venlo, ’t boerebroelofsgezelschap van de Herungerstraot, äöpende eur boerebroélofsjaor met ’t bekind make van ’t gezelschap en ’t paote van ’t boeremoos. Broéd Simoon en broédegom Klaos waere op boerebroélofsdinsdaag 2020 in d’n ónech verbónde. Hiél vuuël suukses met de veurbereidinge en vuuël joeks en jen gewins!

 

Jubileumfees

Wat hebbe we ein schoeën jubileumfees meuge belaeve. 4 kiér 11 jaor viere met alle minse die ós ein werm hert toedrage, veult aan wie ein werm bad! ’t waas eine fantastische middaag en aovend. Iers de ontvangs op ós schoeën stadhoes door börgemeister Antoin Scholten van ós vrinde oét Rheinbrohl met Ortsbürgermeister Oliver Labonde, Weinkönigin Eva Emrath, Weinprinzessin Luisa Becker, Carla Wilkes en leje van de HVV Rheinbrohl en neet te vergaete ózze beermeister tiedes ’t Wienfees, Willy Cergar. Ós gaste ware “begeistert” euver wat Venlo te bieje haet. Eine moeje start van ózze jubeldaag, met dank aan ózze burgervader veur de oetleg! Dan de jubelaovend: Sinterklaos had de meujte genaome efkes langs te kómme en wis de luusteraers te boeje met allerlei annekdotes, Sandra en Marco wiste de dansvloer vol te kriege. Leon woort beneump as ierelid en kreeg daoveur de golde speld oetgereik. Zelf hebbe we ouk nog inkele toeëne ten gehuure gebrach. Idderein dae d’r aan haet meigewerk um ’t tot zónne knalaovend te make, hertelijk dank daoveur, met ein spesiaal woort van dank aan ós eige organisasiecommissie en de minse achter de bar ónder leiding van Yvonne Gubbels. We zulle ós dezen aovend nog lang heuge! Klik heej veur de foto’s en heej en heej veur de videobeelde

Jubileumfees, Schots en Scheif 4 x 11 jaor.

Gaer nuuëdige weej óg oet op ós jubileumfees. We vraoge óg waal um óg efkes aan te melde op schotsenscheif@hotmail.com

Gerne laden wir Euch zum Jubelfest ein. Wir möchten Euch fragen, Euch per E-mail unter schotsenscheif@hotmail.com anzumelden.

 

 

Vastelaovend 2019

Vastelaovend 2019 leet weer achter ós. Wat blief zien de herinneringe aan dae moeëje tiéd. Gelökkig zien d’r foto’s en filmkes die die herinneringe in stand halde. Klik heej veur ein compilasie van video’s die we hebbe meuge óntvange en heej veur de foto’s. Met dank aan Omroep Venlo ouk de beelde van de optochte in Bliërick en Venlo. Klik daoveur heej.