Merchandise

’t nieje vastelaovesseizoen is weer aangebraoke. Tied um wat aan ózze merchandise te doon. Veur de pries van slechs € 2 kint geej eine moeëje pin koupe veur op ógge vastelaovesoutfit. Ein ander pekske meug netuurlik ouk! As geej wilt krieg ge d’r ouk nog eine Schots en Scheif sticker beej. De pins zien te koup beej de leje van de joekskepèl.

 

Wienfeeste 2015 in Rheinbrohl

Netuurlik waas ’t ouk dit jaor weer fees in Rheinbrohl. Nao wat vertraoging hadde we vriedaag zoeë rónd de klok van half zeve beej Dietmar ós ierste (en zeker neet ós letste) pilske te pakke. Daonao ós slaopplaatse in orde gemak en op naor de Römerplatz, wao we ondanks det ’t fris waas, inkele eurkes meziek hebbe gemak. Daonao weer de kroeg in, waonao ’t veur inkele ónder ós laat (of vruug asse wils) is gewaore. Nao ein prima ontbijt, klaorgemak door Jürgen en Klaus, waas ’t tied um te gaon scheete. D’n “adler” waas gevlaoge, dus maar op schiefkes. Luc waas ózze Schützenkönig met as gooje 2e en 3e Jean-Pierre en Marc. Veur dees prestasie woorte zeej zóndaag op de Römerplatz nog in ’t zunke gezatte. Zaoterdaagmiddaag beej de Wienkeunegin op bezeuk en daonao met de keunegin naor de Römerplatz. Ut waas d’r good vol en de stumming zoot d’r in. Laat op d’n aovend hebbe we same met ’t geweldige orkes Erste Sahne as aafsloeëting Atemlos gedaon. De arrangemente bleke neet ’t zelfde maar ’t kwaam toch weer good ( klik heej veur ’t filmke ) Op zóndaag waas ’t nao ’t ontbijt tied veur ’t bezeuk aan ’t Altersheim. De aldere oet Rheinbrohl genoote d’r van. Zoeëas altied woort ’t waekind aafgeslaote op de Römerplatz. We kieke met vuuël plezeer truuk, met dank aan de HVV Rheinbrohl veur de organisasie!

Klik heej veur de Foto’s

Wienfees in Rheinbrohl

De daag waere korter, aaf en toe liék ’t al ein bietje herfs, maar waerman Piet belaof ós good waerke as weej van 2 wies 4 oktober ós óndertösse tradisjonele oètstepke naor de Wienfeeste in Rheinbrohl gaon make. Weej hebbe d’r zin in en we weite noow al det we door de HVV Rheinbrohl met aope erm waere óntvange. Weej verheuge ós d’r al op door gashier Jürgen in de watte te waere gelag. Laot gaon, laot gaon!

Jubileumoètstepke

Zaoterdaag 2 mei waas d’n daag van ós jubileumoètstepke vanwaege ’t 40-jäörig bestaon. Ut oètstepke woort georganiseerd door ’t LAP- (Loek, Arno, Paul) commitee en brach ós met de bus nao diverse lokasies in ’t zuuje van Limburg.

LAP-commitee, names ós allemaol hertelijk dank veur ’t organisère van dit geslaagde oètstepke!

Heejónder vindt geej ’t verslaag van ’t LAP-commitee en kint geej de foto’s bekièke die d’r gemak zien.

Klik heej veur ’t verslaag of klik heej veur de foto’s 

Jubilarisse

Op de jaorvergadering van 2015 woorte dreej leeje in ’t zunke gezatte. Leon, Aloys en Sef zien vanaaf de oprichting in april 1975 lid van Schots en Scheif. Arno deej ein wäördje en de dreej krege ’t beejbehuurende 40-jäörig jubileumspeldje opgespeld.

Schots en Scheif 40 jaor jónk!

7 april 1975 waas d’n daag det joekskepèl Schots en Scheif woort opgerich. Dit jaor viere we dus ós 40-jäörig bestaonsfees. Umdet 40 jaor veur ein joekskepèl gen joeksig getal is, halde we ’t bescheide wies det we 44 jaor bestaon. Dinsdaag 7 april ós jaorvergadering met aandach veur de viertig jäörige jubilarisse en zaoterdaag 2 mei ein jubileumoètstepke met ós partners.

In tante Bet

Vlak veur de vastelaovend zoot d’r beej tante Bet (de Limburger) ein spésjale oètgave die ging euver ’t fenomeen joekskepèl/joekskapel. De krant vónd ’t de meujte waerd um ouk ein stök euver de historie van Schots en Scheif te schriève. Veur degene die ’t neet gelaeze hebbe, klik heej.

Vastelaovend 2015

Aan alles kump ein ind

Det waas ’t dan, Vastelaovend 2015 is weer verleje tièd. Ut waas eine Vastelaovend met lekker zunke, lekker windje, lekker waerke, met daobeej netuurlik alle ingrediënte die de Vastelaovend zoeë uniek make. Wat blief zien de herinneringe die we truuk kinne haole van de foto’s en de filmkes. Klik heej veur ’t filmke van d’n optoch in Bliërick en heej veur ’t filmke van d’n optoch van Venlo. Ouk zien d’r nog filmkes gemak van de JoekskepèlleParade. Klik daoveur heej of heej, Alle filmkes staon ouk op ós multimediapagina. Heej kinne de vastelaovesfoto’s bekeke waere.

Altweiber in Kölle

Ouk dit jaor zien we weer naor Kölle aafgereis um dao, geneetend van ein schitterend zunke, met de Altweiber fees te viere. Efkes zoog ’t d’r nao oèt det ze ós dao woele halde, want de ganse Bannhof woort aafgeslaote umdet emus zien kufferke had achtergelaote, maar det kwaam allemaol weer good. Klik heej veur de foto’s

De waeke veur Vastelaovend

De Vastelaovend kump d’r weer aan. De ièrste optraejes en oètstepkes ligge weer achter ós. Via de kiekjes heejónder kin d’r nog truuk gekéke waere op detgene wat alweer verleeje tièd is. Klik daoveur heej

JoekskepèlleParade

Ein tradisie die neet mièr is weg te dinke in de Venlose vastelaovend: de JoekskepèlleParade op vastelaoveszóndaag op de Parade in Venlo. Elk jaor opnièj struie de kepèlle vanaaf ein podium eur toeëne oèt euver de vastelaovesvierders. Dit jaor geit det ein biètje anders. Ut podium is ingeruild veur 2 joeksmobiele die midde op de Parade staon, wao vanaaf iddere kepèl ein half oor ein optraeje verzörg.

 

Vacature

In verband met neteurlik verloup hebbe weej ein vacature veur eine bariton- of tubaspeuler. Kinse bariton of tuba speule of wilse ’t gaer lière en vinse ’t leuk um beej ós te kómme speule, meld dich dan via ’t mailadres op de aanvraoge/kóntakpagina of loup ens binne beej de rippetisie (20.30 oor wies 22.30 oor) op dinsdaagaovend beej Grand Café De Maagdenberg. Kontak opneme met ein van de leeje kin neteurlik ouk.

Incognito

Aaf en toe zien d’r van die daag desse d’r incognito op oèt treks. Zónnen daag waas koupzóndaag op de shoppingzone Maasboulevard. Sinterklaos waas d’r, de Pietekepèl waas d’r, ’t waer zoot mei en d’r waas vuuël winkelend publiek. Klik heej veur ein filmke