Op bezeuk beej inkele zörginstellinge, daag 2

Daag 2 van ózze tour langs de zörginstellinge zit d’r ouk alweer op. Wat is ‘t toch fijn asse minse in dezen tiéd bliej kins make met ein stökske meziek! “Jansse” in Tegele vónd det beej ein joekskepèl in idder geval eine bak beer huurt, wao hae dan ouk direk veur zörgde. Geweldig toch! ‘t bleek zelfs meugelik eine anderhalve maeter polonaise aan de gank te kriege. We hebbe dezen tour met vuuël plezeer gedaon en ouk nog aan de ammazuur kinne werke. Danke Zörginstellinge veur óg gasvreejheid! Klik heej veur de foto’s en heej veur de videobeelde.

Op bezeuk beej Venlose Zörginstellinge

In deze rare tiéd toch nog eine kiér kinne träöte. Moeij det we de minse in inkele Venlose zörginstellinge wat aafleiding en plezeer hebbe kinne bezörge. ‘t weer waas ós neet hielemaol good gezind, maar de dankbaarheid van de minse makde alles diek en döbbel good. ‘t optraeje waas netuurlik goodgekeurd en Corona proof! Klik heej veur de video.

 

Vastelaovend 2020

Um gruuëts op te zien waas ‘t thema van Jocus. We sloéte ós daobeej aan! We hebbe met hert en zeel genaote van eine schoeëne Vastelaovend. Klein smetje waas det ‘t weer ‘t neet toeleet det d’n optoch door Bliërick trók, maar det gaon we ein waek later nog efkes inhaole met as gevolg det we nog ein verlengstök tegood hebbe. Foto’s zien heej te kieke, Filmkes van de Venlose optoch heej en heej en ein filmke van de Boerebroelof in Jocus Hoonderstal heej.

De waeke veur Vastelaovend 2020

Inmiddels zien we aan de veuraovend van de Vastelaovend aangeland. Tied um efkes truuk te kiéke nao wat we de letste waeke zoeëal oetgespoeëk hebbe. We zien ónderwaeg gewaes met ‘t Boerebroelofsgezelschap van de Herungerstraot, we hebbe ‘t prinsebal en de resepsie van Vastelaovesgezelschap de Vogelhut gehad en we zien in Kölle gewaes. Nog ein beslaote vastelaovesbal en dan op naor de optochte van Venlo en Bliërick, de JoekskapelleParade en de aafsloeting in Jocus Hoonderstal de Maaspaort op Boerebroelofsdinsdaag. Veur foto’s klik heej, veur ein filmke van Altweiberfastnacht klik heej, op waeg met ‘t Boerebroelofsgezelschap klik heej en veur de Vogelhut klik heej.

Vastelaovesprogramma

Ós vastelaovesprogramma steit in groeëte liene vas. Wellich zeen we ós beej ein van ónderstaonde aktiviteite? Weej hebbe zin drin!

26 jan 2020 (zón) Krense met Boerebroelofsgezelschap Herungerstraot
01 fib 2020 (zao) Prinsebal VG de Vogelhut
09 fib 2020 (zón) Prinseresepsie VG de Vogelhut
12 fib 2020 (woe) Seniorezitting SOB Maaspaort met Boerebroelofsgezelschap
15 fib 2020 (zao) Onderwaeg met Boerebroelofsgezelschap Herungerstraot
20 fib 2020 (dón) Altweiberfastnacht Kölle
21 fib 2020 (vri) Brasserie, beslaote Vastelaovesbal
23 fib 2020 (zón) Optoch Bliërick
23 fib 2020 (zón) JoekskepelleParade
24 fib 2020 (mao) Optoch Venlo
25 fib 2020 (din) Boerebroelof in Jocus Hoonderstal de Maaspaort (begin 16.00 oor)

Weej winse óg ein fantastisch 2020!

Vuuël gelök en gezóndheid. Det ‘t ein spetterend 2020 meug waere!

Joekszitting VG de Vogelhut

Net veurdet de december feesdaag veur de deur staon hebbe we al efkes aan de Vastelaovend kinne ruke beej de joekszitting van VG de Vogelhut. Het waas eine kwante aovend veur eine volle zaal met ein keur van artieste die de minse in de juuste stumming wiste te bringe. Ein zitting waobeej vuuël woort gelache maar ouk inkele traone vloejde tiedes ‘t aafschied (Facebook filmke) van ‘t dreejspan Prins Michel I en zien adjudante Roy en Rob. Met dank aan VG de Vogelhut veur de gooje verzörging!

Wien- of beerfees: Rheinbrohl wir sind dabei!

Ozze spesjale verslaaggaever haet ein stökske geschréve euver ‘t Wienfees in Rheinbrohl. Laes ‘t heejónder. De foto’s kinne heej bekéke waere.

Vriedaag 4 oktober waas ut weer zoeëvaer: ut culturele hoeëgtepunt van ut jaor stónd veur de deur, ‘t Wienfees in Rheinbrohl, al vanaaf 2003 ut vaste treffe met alde en nieje bekinde.
Vanaaf un oor of 4 op vriedaagmiddaag dröppelde idderein binne beej ut kefeeke van Dietmar dae un lekkere stange Bitburger oét ut vaat serveerde. D’r woort heerlik gealdehoord en ut waas flot un vetrouwd gehiél zoeë met de plaatselikke hangjeug. Ut tempo waas strak te neume en naodet we tössedoor de bedjes hadde opgemak in de Turnhalle beej de plaatselikke Turnverein 1882 e.V. in de Maria-hilf-mir-doch-Strasse, bleef det tempo hoeëg. Dan maar rap unnen telder Duits bikke besteld: unnen bak slaaij, Pommes en Schnitzels in alle soorte met ein gemeinschappelik kinmerk: zoeë groeët wie un deurmat. Oh jao, d’r meus ouk nog efkes getraöt waere op de Römerplatz. Naodet we ut podium voldoende oranje hadde gemak, woorte d’r unne gas nummers gespeuld die d’r in ginge wie kook. Willy’s kleplokaal woort ouk nog met un bezeuk veriert en ouk heej waas ut opvallend det vueël kleppe gaar neet deur hoof te zien. Met regelmaot woort d’r eine gesponsord. De plekband dae achter de bar loog um ós daor te halde, waas gaar neet nuuëdig gewaes.

Ja, en dan geit d’n daag op ut ind en kump die Turnhalle toch waal good van pas. Op dieke matte, kleine matte, lange matte, veldbedjes, lóchbedjes, zeg maar alles wao desse op kins ligge, woort de nachrös aanvaart. Tenminste veur degene die de melis vol hadde. Inkele hangjongere kwame netuurlik waat later.

Zaoterdaagmorrege krege we van ozze persuuënlikke betreuer Jürgen en zién rechterhand Klaus un heerlik óntbijt geserveerd. Alles woort resloos opgemiecheld en toen woort ut tied um ut plaatselikke Schützengilde Rheinbrohl 1927 met un bezeuk te veriére. Idder moch 5 kier met scherp paave. We zoele ut opneme taege de Franse partnerstad van Rheinbrohl maar die Franse dörfde neet. Begriepelik want d’r woort “met sjerp gesjaote.” De ierste klepkes woorte alweer genuttig maar ut waas dan ouk al haos twellef oor. Wien, baer en unnen inkeling dae neet dórfde un colaatje. Good, nao ald Duits gebroek stónd d’r um tien euver twellef un gans peloton BBQ-ers klaor die wörskes en karbenaadjes veur de ganse meute braojde en nao binne brachte. Dao woorte die met slaaij, stekkemik, en wat neet miér, nao binne gehouwd.

Toen waas d’r tied um d’n binnekant van de ougleeje te gaon bekiéke in os hotel aan de Maria-hilf-mir-doch-Strasse. De meiste verstendige minse makde dao gebroek van. De minder verstendige meuste waal! Toen woort ut tiéd um zónder raegen, in schots kostuum mét ónderfleur nao de Römerplatz te gaon wao de Wienkeuninginne, Prinsesse en al eur helpers zich presenteerden aan ut volk. Ierlik is ierlik: die van ós, Königin Eva en Prinzessinen Andrea en Luisa ware met aafstand ut moeëjste iets wat de meiste kepelleje ouk vónde. Dao zoelse waal un glaeske wien mei wille drinke… en…

Det gebeurde dan ouk. Ut is wörkelik ónveurstelbaar det d’r tósse ut nuttige van pak um beet 30 liter wién nog tied waas um 4 setjes muziek te make hoewaal de letste nummers veural enthousias ware… Gelökkig waas d’r genóg geklep zoeëdet de meiste ut neet kalt krege. Die det waal krege, of die anderszins un bietje óngesteld ware, ginge nao de Maria-hilf-mir-doch-Strasse um te gaon knippe.

Zóndaag waas haos utzelfde as zaoterdaag: we ginge in de stroumende raegen nao ut Erntedankfest in St. Hubertus, ut Altersheim. Dao woorte geschenke getausch, limenaad gedrónke, unne inkeling toch beer, Bürger Oliver stook de kepèl nog unne gas vere in de kónt en Arno belaofde det we meschiens waal truuk kómme.

Good, samegevat: de Schützenkeuning van de kepel is Wiek, Duitse biefstök haet vueël bot, Rheinbrohl haet de lekkerste wien, kiëk maar nao de vrouwluuj, 30 liter wien is un eitje, de zwaortekrach nao twellef oor is groeëter as d’r veur, de plaatselikke kebabtent haet mier as vleis, de HVV besteit, inkele Bitburger kleppe is neet erg…, de hellinge zién stiel, GUTENMORGEN is neet altied unne gooje morrege, snörke wuurt neet veroorzaak door tevuuël kleppe, met 19 man in un Turnhalle slaope is superaffentietengeil.

Ut zoel zoeëmaar kinne det de Jahresversammlung zaet: bis nächstes Jahr Reinbrohl!!!!

Wienfeeste Rheinbrohl

Weej hebbe zin drin …, ouk dit jaor weer naor Rheinbrohl! Laes heejónder wat de Wienkönigin schreef:
 
Liebe Rheinbrohler, liebe Besucher aus Nah und Fern,
herzliche Einladung meine Gäste beim Weinfest am caput limitis, am ersten Wochenende im Oktober, in Rheinbrohl zu sein.
Mit meinen Weinprinzessinnen Andrea und Luisa feiern wir mit Live-Musik, kleinen Köstlichkeiten und leckerem Mittelrheinwein.
Natürlich werden auch unsere Niederländischen Freunde “SCHOTS EN SCHEIF” dabei sein, auf die wir uns ganz besonders freuen.
Aus unserer Partnerstadt Bourcefranc le Chapus/Frankreich kommen die frischen Austern, ein highlight an unserem Weinfest!
Die Weinstandbetreiber erwarten Sie und bedienen Sie gerne.
 
Wir freuen uns auf ein tolles Wochenende
Ihre Weinkönigin Eva
von Rheinbrohl & Hammerstein
 

Schots en Scheif koedeljach oétgebreid

Ózze koedeljach is weer oétgebreid. Fréderique en Luc zien de trotse elders gewaore van dochter Romée. De Schots en Scheif femilie wins eur van herte perficiat met dit kleine wereldwonder en hiél vuuël laevesgelök met z’n dreeje!