Hittegolf tièdes de wiénfièste.

Waat ein waerke op de wiénfièste! Det is weer ens wat ander dan d’n dieke trui aan in oktober. Ut waas noeëdzaak um elk plekske schaduw te benutte, umdet ’t speulend in de zón neet um te harde waas. Op zaoterdaag krege weej ’t al veur de middaag werm, maar det waas de schöld van Ehrenvorsitzender Jürgen van de Heimat- und Verschönerungsverein, dae ós meinoom euver eine wienberg wao ein klumgeit nog probléme zoel kriege, um ós aan d’n andere kant via een touw(!!!) weer nao onder te laote. Gelökkig makde hae det weer good door ós beej de plaatselijke Winzerboer “eine Weinprobe” aan te beeje. Daonao waare weej waal al in de stumming um d’r op de drökbezóchte Marktplatz ein fiès van te make.

Beej de start op zóndaagmorge meuste we waat róstiger aandoon umdet beej ‘t bezeuk aan ‘t Altersheim ’t gevaor bestónd det d’r anders ein paar de letsten aom zoele oétblaoze. Det ware d’r euveriges gen van ószelf, alhoewaal d’r eine inkeling neet vaer vanaaf waas. Daonao kós d'r beej ’t Frühschoppen op de mert weer gaas gegaeve waere.

We kinne truuk kiéke op ein geslaag wiénfiès waobeej d’n d’n band met ós vrinde in Rheinbrohl weer stevig is aangehaold.

TRUUK