En toen waas ‘t stil……

D’r waas ens eine groep muzikante die ut weer ens kwant vónde um met de maedjes ein wiekend d’r tösse oèt te knièpe.Maar ja, waat duisse dan? Wie zörgse d’r veur det die maedjes zich ouk good ammezere zoeëdet de jónges zich in iddergeval good ammezere? De vruuëgs de LAP-zwens en alles kump good.

Alles kump good huùr ik óg zegge? Jao, alles. De paks dich ein bus oèt Pruuses en die luuëtse um ‘n eurke of 09.30 op zaoterdaag zo’n 26 minse ophaole beej Huize Maagdenberg en dan geisse gewooën rieje, naodet al die minse euren handel veur de lange reis in de kófferruumte hebbe gelaaje. Veural neet zegge wao desse haer geis en ‘t geit vanzelf loupe. D’r zien d’r namelik die d’n daag van teveure alle meugelikhede oètzeuke wao de reis nao toe ZOEL KINNE gaon. Noow dan bisse wièd genóg: de luuëts die bus in Breede AA anhalte en de wieliekufferkes oèt de bus haole. Neet te gluive trouwes waat sommige minse zich veur 36 oor allemaol in ein kóffer proppe. Dao kinse ein jaor mei wegblieve.

Um de feesvreugde te verhuuëge zitse veur ‘t hotel (de Apollo twieëje) de keunegin en eure zoon neer en vaerders loupe die muzikantejónges en maedjes wie ‘nne koedeljach achter Trix aan det logement binne wao dan weer waal unne lekkere borrel klaor steit, zoedet ut alkehol% intelik van die hatelikke “0”aafkump. Dan is ut veural belangriek um neet te vol te programmère: gaef ze de ruumte.

Koffers verzamele, ierste indrökke deile en op nao ‘t centrum van BreedeAA wao un twellef eurke um un eurke of half ein klaor steit: ‘n Brabants tössedoortje det idderein zich good leet smake, zelfs de stadsgids Jan dae zien vrouw Anne mei had genaome zoeëdet hae de waeg neet kwiet zoel waere. Dae had mich toch waat te vertelle euver BreedeAA en dae had zich kwant veurbereid. Weej zien haos euveral gewaes: stadspark / Nassaumonument / KMA / linke straotjes / de merret / beej unnen tempel / ST. Juttemis / d’n Beijerd / stadhoes / begienehaof / winkelstraote / Willem 1wies vieftig en al zien vrouwe.

Ja, tössedoor mósse netuurlik waal genog kleppe um neet tevuuël vaaije in ut gezich te kriege en dan is ut zoeë vièf oor, tièd veur de meiste minse um de Apollo twieëje in te gaon richte. Andere minse drinke d’r nog eine met de stagdsgids en zien vruike um efkes nao te vraoge wao we ouk alweer allemaol ware gewaes. Nao ‘n moment van bezinning (waat neet lang deurde) stond idderein um half zeve onder in de foyer, zenewechtig, lichtelik gespanne en veural vol verwachting. Waat zoel d’n aovend bringe?? Inkele jónges zeije ut achteraaf al zeker te hebbe geweite det d’r eine dinnershow zoel waere bezóch wao Hollandse leedjes zoele waere meigegaldert. Unne zeker geslaagde aovend wao minnigein zien favoriete leedje mei haet gebröld! Nog ‘n klepke in de plaatselikke brouwerie , wao net ein paar raojspelkes woorte gedaon wao vuuël maedjes aan mei hebbe gedaon maar waat zeej jaomer genóg neet zoe good begrepe, en daonao woort ut veur unne gas muzikale vrinde tied um de britse op te gaon zeuke, ouk vanwaege de laeftiedsdifferensiasie. Inkele jóngere leeje bleeve nog efkes de wach halde wao zeej neteurlik alle rech op hadde!

Zondaagmorge, geej gluif ‘t of neet, stond dae Wielie oet Pruusses weer um half elf veur ‘t hotel met zien bus met parapluus, maar neet naodet idderein op zien eige kaemerke heerlik wakker waas gewaore, verkwikkend kós douche en zien buukske lekker rond had gemiecheld aan un wörkelik woor good ontbijt, waobeej vuuël woort geklasjeneert euver de prachtigen daag van gister en waat d’r noow waal neet zoel kómme. D’r waare d’r weer beej die ‘t achteraaf al persiès wiste det weej nao Bels zoele gaon, maar toch ouk weer neet. Noow woort ‘t spannend: weej ware ièrs in Bels en daonao in Nederland. Baarle Hertog, Baarle Nassau, Hertog, Nassau, Hertog, Nassau. Sodeju, wao zien weej eigelik?? Good det zónnen Belsen rondleibobo (dae ouk met zien eige vrouw rondleep trouwes) persiès kós vertelle wao weej in Baarle Nassau ware want weej wiste ut zelf neet mier. Dae vieze möp wis zelfs persiès te vertelle waorum de Belse breevebusse vertikaal stónde en de Nederlandse horizontaal. Nae, ierlik dae haet ós d’r oètintelik baovenop gehólpe want nao half doorgesneeje huuskes, Hollandse en Belse hoèsnummers, grenze die dwars door hoeskamers leepe, Belse of Hollandse belasting schokke, in Bels of in Holland bevalle, waare weej rièp veur de psiegiater. Maar good det d’r toen net in d’n Ingel ein eenvoudig buffetje klaor stónd wao minse toch weer gewooën 3 kier naeve leepe.

De res van ut middagprogram woort gevöld door spelkes die ós gezelschap op ut lief ware geschreve op landgood Schaluinen, wao weej met de bus haer koetsde en IN de bus minse de paraplu van ózze Pruus dankbaar gebroekde. Ut raegende dus boète en binne. Maar good, dees organisasie waas neet veur ein gaat te vange en dan regele det beej aankóms de raegen zich gedeis hilt is veur de LAPzwens ein peuleschilke.

Weej meuste, as ièrste opdrach, teams make en dao kwame weej, wie verwach, zelf neet oèt. Toen haet ózze persoenlikke trainer Axel maar klupkes gemak wao haos idderein tevreeje mei waas. Weej hebbe ze veur ’t gemaak maar team ein en team twieje geneump. Op nao ‘t handbaogschete wao minnig paar noow pas wet det de partner waal degelik met scherp kin schete. Met linkse en rechse handbaoge woorte d’r piele weggepaaf en allemaol in de gooje richting: eine centimaeter of vief IN ut bord, eine maeter of ein NAEVE ut bord. Vet spelke, maar ut echte werk meus nog kómme. Bosgolf en reek goeëje ware de volgende onderdeile en ‘t mót gezag: d’r woort ièrlik, zonder foetele en met echte olympische gedachte door idderein deilgenaome. Det d’n baeker veur de winnaers woort verstóp, takke op 't bospaad woorte gekiepert, de telling beej ut bosgolf neet hielemaol klopde, d’r met balle gewip woort, de reek in ‘t hui woort geprik deej dao allemaol niks aan aaf. Ut schema um d’n baeker beej idderein ein waek op de schouwmantel te zette waas gauw gemak en ouk heej woort d’r beej un straolend zunke ‘n lekker klepke gepak.

Duùdelik waas inmiddels gewaore det die knöppels oet Amsterdam kampioen waare gewaore en det makde det weej truuk ginge nao Baarle Nassau of toch Hertog? Truuk beej d’n Ingel stónd ós nog un oètstaekend werm loupend maar toch stilstaond buffet te wachte wao de gemiddelde aafnamefrekwensie op twieëje-en-un-half oetkwaam. Inkele dames leepe oet gewuuënte efkes naeve d’n Thai op de poepdoes. Dae makde zo’n lekker whoesjjj geluud en ut huidje kreeg van die lekkere dumpels. Begriep geej ut nog?? De zals maar waat lekker vinde!! Te vermelde velt heej ouk nog det taofel ein met twintig persoeëne 2 knoeperts van schaole kreeg met einen berg iès en slaagroum wao desse neet euverhaer kós kièke. Taofel twieëje kreeg met 8 persoeëne ein klein, aangepas, bescheije schöttelke wao nog ietskes van euverbleef. Wie de giere vlooge die van taofel ein op ut resje aaf. Nog moeëjer: ós bedeenmevrouw vroog of die van taofel ein dan nog meschiens un biètje iès woele. Oèt fatsoen zaesse dan nae, maar die neet! Die hebbe die derde schaol auk nog kompleet aafgelek. Neet te gluive! Die hadde de melis nog neet vol.

Ut woort alsewiel al ein biètje duuster en alles waat begint kump ouk wies ein int: tièd um nao hoes te gaon! Dae leeve meneer de Pruus stónd weer veur de letste kièr veur ós klaor en dae koetsde met de ganse kliembiem, de buukskes gevöld, de nekskes gewasse en de ónderbóks weer schoeën, truuk nao Venlo, wao Francien, Nicole, Marij, Jolanda, Sonja, Virginie, May & May, Marie-Jose, Annemiek, Marjo, Felice en Corrine maar netuurlik auk Maurice, Pierre, Bob, Marc, Ben, Wieke, Sjaak, Jos, Leon, Sef, Sjraar en Jean-Pierre rap nao hoes toe ginge um te druime euver die moeëje, schitterende, weergaloze reis zoeë eminent, perfek en as vanzelfspraekend georganiseerd door Naul, Narno en Noek: de dreej ENS

TRUUK